Wala pa nabugtuan sang paglaum ang Iloilo Provincial Board nga mapasanto pa sang syudad kag probinsya ang ila nga Local Public Transport Route Plans (LPTRPs) kag mabuhinan ang hassle sa mga driver sang public utility vehicles (PUVs) kun mapatuman na ini.
Ang Iloilo City Council ang may yara na sang naaprubahan nga LPTRP nga mandated sang Memorandum Circular No. 2022-024 nga gin-isyu sang Land Transportation Franchising and Regulatory Board (LTFRB) sang nagligad nga Pebrero 2022.
Ang problema nga ginalantaw amo nga matapakan sa sini ang mga ruta sang iban nga jeep halin sa probinsya bangud indi na pagpahanugutan ang mga jeep halin sa mga banwa nga makasulod sa syudad bangud tubtub na lang sila sa mga transport terminals.
Sa interview sang Bombo Radyo kay Board Member Ramon Sullano, chairman sang Committee on Transportation and Public Utilities sa Sangguniang Panlalawigan, iya ginpahayag nga indi pa pasado ang counterpart plan sa probinsya bangud may mga pagbag-o pa sa plano nga dapat nga hitsuhon.
Ginpaathag ni Sullano nga isa sa ginalantaw problema sa probinsya amo nga ang ila nga transport terminals ang nahamtang man diri sa syudad.
Kun ma-finalize na kuntani ang LPTRP sang probinsya, amo pa lang kag ipasa ini sa Committee on Transportation and Public Utilities, kag may ipatawag nga public consultation kag hearing agud mapat-od nga indi sini matapakan ang pagsulundan sang iban nga mga lugar.
Ang problema suno kay Sullano, sang ginpasar sang syudad ang LPTRP, wala sini napatawag sa public hearing ang probinsya. Ini ang rason suno kay Sullano nga daw nakibot man sila sa gulpyada nga pagbag-o. Ang pinakamakaluluoy diri suno sa natungdan amo ang mga jeep halin sa mga banwa nga kaiping sang syudad — Pavia, Santa Barbara, Leganes, kag iban pa.
Subong nga adlaw may ginpatigayon nga meeting ang syudad, probinsya, kag ang ila tagsa ka Planning and Development Offices (PPDO).
Diri ginalauman nga mahisayran ang tagsa ka sentimyento sang syudad kag probinsya.
