ILOILO CITY – Naglab-ot na sa apat ang patay bangud sa dengue hemorrhagic fever sa probinsya sang Iloilo.
Sa data sang Iloilo Provincial Health Office (PHO), naglab-ot na sa 72 ang kaso sang dengue kag apat na ang patay.
Sa interview sang Bombo Radyo Iloilo kay Ma. Jennifer Joy Oñate, Health Promotion Officer II sang Iloilo Provincial Health Office, iya ginpahayag nga apisar nga mas manubo ang kaso sang dengue subong nga tuig kun ikumpara sang nagligad nga tuig, may yara naman sang na-record nga casualty.
Sang nagligad nga tuig, may yara sang 74 ka kaso sang dengue humalin sa Enero 1 tubtob Marso 5 apang wala sang casualty..
Ang apat ka mga napatay ang nagikan sa banwa sang Guimbal, Igbaras, Leganes kag Passi City.
Suno kay Oñate, may yara sang nagkalamatay sa dengue bangud posible nga nakulbaan ang mga ini nga magpadulong sa ospital sa kahangawa nga magpositibo sa COVID-19 gani ulihi na nga ginadala sa ospital.
Dugang pa ni Oñate, padayon man ang pagpatigyaon sang Limpyo Iloilo Program sa mga kabanwahan sa probinsya.
