Indi lang industriya sang baboy ang ginakudalan sa probinsya sang Iloilo kundi mangin ang poultry industry.
Kasunod ini sang kahangawa nga maka-record man sang kaso sang avian influenza ukon bird flu sa probinsya.
Ang bird flu isa ka infectious type sang influenza nga nagalapta sa mga pispis kag na-detect na ang H5N1 strain sini sa pila ka mga uma sa Bulacan kag sa Pampanga kun sa diin may ginasagod nga mga pato kag pugo.
Agud nga malikawan nga makasulod ini sa lain nga mga lugar, may yara sang Memorandum Circular nga gin-isyu ang Department of Agriculture kun sa diin nakasaad nga suspendiron sang 30 ka adlaw ang pag-transport sang domestic kag nadakop nga wild birds kag poultry products halin sa Luzon.
Sa probinsya sang Iloilo, ginpahayag ni Iloilo Provincial Veterinarian Dr. Darel Tabuada nga bantay-sarado gid ang mga pantalan agud nga ma-check ang mga kargahan kag suludlan sang manok.
Ginabantayan ang ports of entry sa probinsya kaangay sang seaports sa Dumangas kag Estancia amo man ang Iloilo Airport sa Cabatuan.
May yara na nga daan sang naka-standby nga Provincial African Swine Fever Task Force halin pa sang 2020 gani nga gamiton na lang ini sang probinsya agud nga makabantay man agud indi makasulod sa Iloilo ang mga live birds kag poultry products halin sa Luzon.
