ILOILO CITY – Indi na makapasakop sa 2022 World Indoor Athletics Championships sa Belgrade, Serbia si Filipino Olympian world no. 5 pole vaulter EJ Obiena matapos nga wala ini gin endorso.
Sa Facebook post ni Obiena, iya ginpahayag nga siya gid lamang ang naga isahanon nga top-ranked vaulter nga indi magpasakop sa nasambit nga competition.
Dugang pa ni Obiena, sa pinakaulihi nga mga resulta, kwalipikado siya sa World Indoor Championships kag nagapanglima sa kalibutan kag nagakapot sang ika-apat nga may yara pinakamataas nga jump of the season.
Yara man siya sa maayo nga kondisyon kag handa nga mangin labing una nga Philippine home-grown athlete nga mag-compete sa World Championship kag subong kuntani suno sa iya ang ti-on agud nga makuha sang Pilipinas ang medalya.
Pahayag pa ni Obiena, saksihan nalang niya ang pagkuha sang medalya sang iban nga pungsod nga kuntani para sa Pilipinas.
Ginkasubo ni Obiena ang indi niya pagpasakop kag ginpabutyag nga nabuy-an sang pungsod ang tsansa nga ipakita sa kalibutan ang ikasarang sang Pinoy.
Kung madumduman, sang Marso 8, wala ginlakip sang Philippine Athletics Track and Field Association (PATAFA) si Obiena sa listahan para sa Southeast Asian Games kag bangud sini, wala siya sang endorsement para sa World championship.
Apang, ginlakip sang Philippine Olympic Committee si Obiena para sa SEA Games.
Subong nga tuig, duha ka gold medal ang nadag-an ni Obiena kag 5.91 meters na ang iya highest jump.
