ILOILO CITY – Ginakahangaw-an sang Iloilo City Alliance of Operators and Drivers Transport Cooperative (ICAODTC) nga mauntat ang ila operasyon sa ti-on nga indi sa gilayon ma-release sang Department of Transportation (DOTR) ang fuel subsidy sang mga drivers.
Sa interview sang Bombo Radyo kay Rizal Alido, Board Secretary sang ICAOTDC, iya ginpahayag nga dako ang posibilidad nga mag-untat sang operasyon ang ila kooperatiba sa tion nga indi na masarangan nga masustinir ang pagpasweldo sa ila mga drivers.
Dugang pa ni Alido, ang suspension sang excise tax ang nakita nila nga solusyon sa padayon nga pagsaka sang presyo sang gatong.
Igasumiter pa sang kooperatiba ang ila nga proposal sa Office of the Transport Cooperative may kaangtanan sa plano nga pagpasaka sang pamasahe.
Pahayag pa ni Alido, sampaw-sampaw nga problema ang ila nga na-ekperyensyahan humalin sa epekto sang COVID-19 pandemic kag subong, ang nagataas nga presyo sang gatong nga mahimo magasaka pagid bangud sa kinagamo sa Ukraine.
Nagalaum naman si Alido nga direkta nga mahatag sa mga drivers ang P6, 500 nga ayuda nga ginapahayag maabot sa Marso 15.
Nagpanawagan naman ini sa gobyerno nga talupangdon ang mga transport groups nga tuman ka apektado sang major fuel price hikes.
