ILOILO CITY – Nagapanawagan sang dugang nga bulig ang Iloilo City Social Welfare and Development Office (CSWDO) sa mga Ilonggo nga may yara sang bulawanon nga tagipusu-an nga mahimo makabulig sa mga biktima sang sunog sa Zone 1, Brgy. Old Airport, Mandurriao, Iloilo City sang nagligad nga Marso 11.
Naglab-ot sa 213 ka mga indibidwal ang apektado nga ginabug-usan sang 99 ka mga pamilya kag 66 diri ka pamilya ang yara sa evacuation center.
Nagapabilin sa 45 ka mga balay ang gin-upok gid sang kalayo samtang 18 naman ka mga balay ang partially damaged.
Sa interview sang Bombo Radyo Iloilo kay Teresa Gelogo, head sang CSWDO, iya ginpahayag nga magluwas sa pagkaon, kinahanglan sang mga nasunugan ang gamit sa kusina kag construction materials agud nga liwat nga makapatindog sang balay.
Una na nga nagpasalig ang syudad nga may yara sang P10, 000 para sa mga pamilya nga totally damaged ang balay kag P7, 000 para sa mga partially damaged nga balay.
Suno kay Gelogo, dako ang bulig sang mga Ilonggo nga nagpalab-ot sang pag-ulikid sa mga nasunugan.
