ILOILO CITY – May yara na sang mga manufacturers sa pungsod nga nagpadala sang sulat sa Department of Trade and Industry (DTI)- Central office nga naga-request nga mapasaka sila sang ila nga suggested retail price (SRP).
Ini bangud man sa nagapadayon nga pagsaka sang presyo sang gatong kag mangin sang presyo sang materials kag packaging.
Sa interview sang Bombo Radyo kay Judith Degala, provincial director sang DTI-Iloilo Province, iya ginpahayag nga padayon subong ang strict evaluation sang ahensya angut sa request sang mga manufacturers.
Dugang pa ni Degala, indi pa sila makahatag sang pat-ud nga impormasyon kun pila ka pesos ang posible nga i-saka sang presyo sang mga nagapanguna nga balaklon sa merkado.
Sa subong, ang pinakaulihi nga pagsaka sang SRP ang natabo sang Enero 27 subong nga tuig.
Nagpasalig si Degala nga kun may yara gid man sang pagtaas sang presyo sang balaklon, ginatun-an ina sang maayo kag ginapahibalo sa publiko antes ginapatuman.
Samtang, may kaangtanan naman sa isyu sang inflation, indi makahatag sang impormasyon si Degala bangud nagahulat pa ini sang ipapanaog nga advisory sang central office.
