Ginpasalig sang Department of Trade and Industry (DTI) nga mangin estable ang presyo sang tinapay sa masunod nga tatlo ka bulan apang ginapanan-aw nga posible may pagsaka sa presyo sang canned sardines.
Suno kay DTI Undersecretary Ruth Castelo, nakabaton na sila sang request halin sa sardines manufacturer nga hulagon ukon pasakaon ang presyo sa sardinas bangud sa igu man sang pagsaka sang presyo sang gatong.
Pahayag ni Castelo, ginatun-an nila ang request kag iga-negosyar kun pwede pa man nga amo lang anay ang presyo.
Apang kun hinali nga maaprubahan ang price hike sa canned sardines, indi man ini mangin epektibo gilayon.
Suno kay Castelo, ginahatagan pa man sang tion ang DTI nga mabinag-binag kun san-o i-increase ang presyo.
Sa pihak nga bahin, wala pa sang bakers kag bread manufacturers nga nagpasa sang request sa DTI para sa price increase sa ila nga products.
Ini bangud secured man suno sa iya ang wheat supply sang pungsod sa sulod sang tatlo ka bulan.
Suno pa sa DTI, nakabaton na ang flour millers sang bastante nga suplay para sa isa ka bulan kag nakabayad naman sa shipments para sa masunod nga duha ka bulan.
Nahibaluan nga sang nagligad lang mga sinemana, padayon man ang pagsaka sa global price sang wheat bangud sang gamo sa Russia kag Ukraine. Ang duha ka nasambit nga Eastern European countries amo ang ginahalinan sang ginabanta 29 percent sang global wheat exports. ##
