ILOILO CITY – Gintawag nga ‘fake account’ sang 1st nominee sang Uma Partylist ang isa ka Facebook account nga nagagamit sang ila pangalan sa pagpang-atake sa pila ka mga opisyal sa syudad kag probinsya sang Iloilo.
Sa nasambit nga Facebook account, ginapakamala-ot kag ginahabuyan sang isyu ang pila ka alkalde sa probinsya, si Iloilo City mayor Jerry Treñas, Iloilo Governor Arthur Defensor, Jr., Iloilo City Congresswoman Jamjam Baronda kag mangin ang 1st nominee sang Uswag Ilonggo Partylist.
Sa interview sang Bombo Radyo kay Atty. Hansel Didulo, 1st nominee sang Uma Partylist, iya ginpahayag nga may yara na sila sang person of interest nga amo ang responsable nga nagagamit sang pangalan sang ila partylist.
Dugang pa ni Didulo, sa una pa lamang nga post sang nasambit nga account, ginpa-blotter na sa police station kag pagkatapos sadto, nag untat na sa pag post ang account apang liwat naman nga nagbalik.
Bangud sini suno sa natungdan, ginatun-an na sang ila mga abogado ang pagpasaka sang kaso batuk sa persona nga nagaguba sang ila pagalan.
Pahayag dugang ni Didulo nga isa gid lamang ang ila official Facebook page nga amo man ang ginkuha-an sang accreditation sa Commission on Elections (COMELEC).
Nagpanawagan naman sa publiko si Didulo nga indi magpati sa Facebook post sang nasambit nga fake account.
