ILOILO CITY- Wala pa sang identity ang duha ka mga suspek nga naghold-up sa isa ka driver sang van sa Brgy. Nalumsan, Carles, Iloilo.
Ang biktima amo si Ernie Porras, residente sang banwa sang Estancia.
Sa interview sang Bombo Radyo kay PMaj. Nestor Bacuyan, hepe sang Carles Municipal Police Station, iya ginpahayag nga base sa imbestigasyon, ginpalapitan sang isa sa mga suspek si Porras sa terminal sa Estancia kag gin-negosyar nga arkilahan ang van kag sugaton ang mga pasahero sa Nalumsan.
Nagsakay sa motorsiklo ang suspek kun sa diin nagasunod man ang van kag pag-abot sa amo nga barangay, may lalaki nga nagabantay sa dalan kag ginpadulog ang van kag nagdeklarar sang holdup.
Nakuha gikan kay Porras ang ₱14,000 nga cash kag isa cellphone.
Gilayon naman nga nagpalagyo ang duha sakay sa motorsiklo.
Sa bahin naman sang Estancia Municipal Police Station, ginpahayag sang ila hepe nga si PLt. Joebert Amado nga tinguhaan nila nga makakuha sang CCTV footage sang isa sa mga suspek nga naghalin sa terminal sa amo nga banwa.
Naga-coordinate man ini sang Carles PNP para sa madasig nga pagtumod sa mga suspek.
=========
