ILOILO CITY- Nagasalangisag sa gihapon ang mga walk-in passport applicants sa Consular Office sang Department of Foreign Affairs(DFA) sa isa ka mall sa Iloilo City.
Sa interview sang Bombo Radyo kay Randy Simpas, isa ka Overseas Filipino Worker(OFW), iya ginpahayag nga dismayado ini bangud wala siya gin-akomodar.
Suno kay Simpas, 2018 pa siya nagpauli kag luyag niya magproseso liwat sang iya passport agud magbalik sa luwas sang pungsod apang ginhambalan siya sang staff nga indi ini makabig nga active OFW.
Pahayag ni Simpas, naglibog pa gid ang iya ulo matapos gin-abisuhan pa gid ini sang staff nga mag-apply online.
Matandaan nga ginmando ni DFA Secretary Teodoro Locsin Jr. ang pagbukas sang courtesy lane sa walk-in applicants sa tanan nga Consular Offices sa bilog nga pungsod apang may yara sa gihapon sang requirements nga amo ang masunod:
-para sa senior citizens: senior citizen identification card (dapat updan sang isa ka adult)
-para sa pregnant applicants: proof of pregnancy (medical certificate)
-para sa persons with disabilities: valid PWD identification card
-solo parents: valid solo parent identification card
-Minors nga nagaedad 7 anyos panubo (dapat upan sang ginikanan ukon legal guardian): original kag photocopy sang Philippine Statistics Authority birth certificate sang menor de edad, additional documentary requirements kun ang bata wala sang upod nga ginikanan
Ang Overseas Filipino workers kag seafarers nga may incoming ukon active employment abroad ang dapat magpakita sang mga masunod:
-valid Overseas Workers Welfare Administration E-card
-valid employment contract
-valid work visa
-seafarer’s identification and record book (SIRB)
Ang mga eligible applicants ang dapat man magdala sang proof of vaccination.
