ILOILO CITY- Ginaid-idan na sang Department of Labor and Employment (DOLE)-Western Visayas ang pag-review sa naga-eksister nga wage rates sa rehiyon bilang preparasyon para sa posible konsultasyon sa salary hike.
Sa interview sang Bombo Radyo kay Atty. Sixto Rodriguez, DOLE Region 6 Director, kag amo ang nagapanguna sa Regional Tripartite Wages and Productivity Board (RTWPB) sa amo nga review sang wage rates, iya ginpahayag nga ini ang marching order ni DOLE Secretary Silvestre Bello III.
Una na nga ginmando ni Bello sa tanan nga RTWPB nga i-review ang minimum wages agud mabuligan ang mga workers kag ila pamilya nga makatibawas sa ginaatubang nga krisis.
Suno kay Rodriguez, nakabaton man ang regional line agency sang petisyon para sa wage increase paagi sa Negros Occidental Field Office sang damlag lang.
May kaangtanan sa posibilidad sang konsultasyon para sa wage increase,ginpahayag ni Rodriguez nga gina-validate pa ang petisyon kun sa diin kabahin sang proseso ang pag- verify kun ang labor union (petitioner) ang rehistrado sa regional office ukon sa Bureau of Labor Relations.
Ang petisyon nagalakip man sang proposed uniform wage ano man ang industriya kag numero sang workers.
Ang minimum wage workers sa Western Visayas ang nagabaton sang P310 tubtob P395 per day depende sa ila work classification base sa Wage Order 25.
