ILOILO CITY – Nagapabilin nga wala sang Municipal Budget Officer ang Buenavista, Guimaras bangud sa ginapahayag nga pamulitika sa Sangguniang Bayan.
Ang budget officer ang na-dismiss sa serbisyo sang Disyembre sang nagligad nga tuig kag may nagpungko bilang officer in charge.
Sa interview sang Bombo Radyo kay SB Member Cheryl Fernandez, chairman sang Committee on Tourism, History and Culture sang Sangguniang Bayan sa Buenavista, Guimaras, iya ginpahayag nga bangud bakante ang posisyon kag manug-retire na ang officer in charge, nag-open sang hiring si Buenavista Mayor Eugene Reyes kag napilian si Mr. Elmer Diles bilang budget officer.
Bilang proseso, maagi anay sa Sangguniang Bayan para ma-concur bangud department head ang position nga i-hire.
Sang gintalakay na sa Sanggunian, wala na-aprubahan ang hiring ni Diles bangud apat ang nag-aprubar samtang lima ang nag-deny.
Suno kay Fernandez, ang rason sang mga nag-deny amo nga ongoing pa ang appeal sang dismissal case sang nagligad nga budget officer kag posible mabalik pa ini.
Apang suno sa konsehal, base sa pahayag sang tiglawas sang Civil Service Commission, ang appeal ang posible magalawig pa sang pila ka tuig.
Ginalantaw sang konsehal nga posible nga may naga-pressure nga pulitiko sa lima ka konsehal apang wala niya ginhingadlan.
Ginklaro man ni Fernandez nga wala pa naabtan sang banning period sang Commission on Elections (Comelec) ang hiring kay Diles.
