ILOILO CITY – Napatay lang ang tagreklamo apang wala gid naaktuhan sang MORE Electric and Power Corporation ang nagahilay nga poste sa Brgy. San Vicente, Jaro, Iloilo City.
Sa interview sang Bombo Radyo kay Analyn Damires, hinablos sang napatay nga lalaki nga una nga nagreklamo sang nagahilay nga poste, iya ginpahayag nga Oktubre 2021 pa sila una nga nagpalab-ot sang reklamo.
May nagkadto nga personnel sang MORE Electric and Power Corporation kag nagpasalig nga balikan lang sa masunod nga adlaw.
Nagligad pa ang pila ka bulan nga palab-ot sa natungdan apang wala sa gihapon ginbalikan.
Sining damlag lang, nagtaliwan ang tiyo ni Damires kag agud nga indi magsablag sa haya ang nagahilay nga poste, ginmatu-matuhan sang pumuluyo nga patindugon ang poste apang nagakabalaka ang tagreklamo bangud tuman ka delikado.
Suno kay Damires, nakulbaan sila nga posible may matabo nga sunog ilabi pa nga lunsay himo sa light materials ang mga pamalay sa palibot.
Nagalaum si Damires nga sa pagpalab-ot sa Bombo Radyo, ma-aktuhan sang More Power ang ila nga reklamo.
Samtang, sa interview sang Bombo Radyo kay Joy Fantilaga, spokesperson sang MORE Electric and Power Corporation, ipa-check pa niya ang nasambit nga reklamo.
Kun makita nga indi iya sang More Power ang poste nga nagahilay, i-refer niya sa Public Utility Group in Iloilo (PUGI) agud nga mahatagan sang pagtamod.
Suno kay Fantilaga, kun iya sang More Power ang poste, mapatigayon sang inspection ang team kag takdan sang bag-o nga poste.
