ILOILO CITY – Nagapadayon ang imbestigasyon sang Carles Municipal Police Station sa identity sang mga suspek nga nag-hold up sa isa ka van sang Marso 15.
Ang biktima amo si Ernie Porras, residente sang banwa sang Estancia.
Sa interview sang Bombo Radyo kay PMaj. Nestor Bacuyag, hepe sang Carles Municipal Police Station, iya ginpahayag nga nakita sa dash cam footage ang pagpatigayon sang transaction sang isa sa mga suspek kay Porras.
Sa footage, makita nga wala nakasuksok sang mask ang suspek nga nagpalapit sa biktima ginabanta las-siyete tubtob las-otso sang aga kag nagpalapit liwat las-10 tubtob las-10:30 sang aga apang nagasuksok na sang mask.
Apang suno kay Bacuyag, indi klaro ang amo nga footage gani, tinguhaan sang kapulisan nga ma-enhance ini.
Padayon man ang pagchekyar sang kapulisan sa palibot sang terminal kag sa gin-agyan sini agud nga mahibaluan kun bala may yara sang klaro nga footage.
Kung madumduman, nakuha kay Porras ang ₱14,000 nga cash kag isa cellphone sang gin-hold up sang mga suspek nga nagpakunu-kuno nga ma-arkila sang van.
