ILOILO CITY – Tuman ang kalipay sang mag-asawa nga manunudlo matapos nga nakasulod sa Top 10 ang ila anak sa March 2022 Physician Licensure Examination.
Sa interview sang Bombo Radyo kay Domingo Subo, amay ni Dr. Ma. Phoebe Subo nga top 8 sa pasinawan, iya ginpahayag nga nagalaum sila nga makapasar ang ila anak sa pasinawan bangud matutom ini kag handom gid niya nga mangin isa ka doktor.
Si Dr. Ma. Phoebe Subo ang nakakuha sang 87. 08 % nga rating.
Si Subo ang nag-graduate bilang class valedictorian sa Btac. Nuevo Elementary School kag kabahin sang Most Outstanding Pupil in Iloilo.
Nagtapos ini nga rank 3 sa Philippine Science High School- Western Visayas Campus kag Summa Cum Laude kag Most Outstanding Student sa West Visayas State University sa kurso nga Bachelor of Science in Biology.
Nag-graduate si Subong sa West Visayas State University- College of Medicine sang nagligad nga tuig kag rank number 8.
Suno kay Domingo Subo, sang September 2021 pa kuntani makuha sang exam ang iya anak apang naglain ang pamatyag isa ka semana antes ang pasinawan.
Pahayag dugang sang amay, sang bata pa si Phoebe, may hampanganan ini nga stetoscope kag isa ka palatuon nga bata.
Ginakabig naman sang mag-asawa nga bonus sang Diyos nga makasulod sa top 10 ang ila nga anak.
Kung madumduman, nag-top sa amo man nga pasinawan si Dr. Maria Inez Benedicto nga alumna sang WVSU sang nagligad nga tuig.
