ILOILO CITY- Kritikal ang isa ka barangay kagawad matapos nabungguan sang motorsiklo sa Gua-an, Leganes, Iloilo.
Ang biktima amo si Barangay Kagawad Rodel Jovero, residente sang nasambit nga lugar kag nag-angkon sang dako nga pilas sa ulo samtang ang nagamaneho naman sang motorsiklo amo si PFC Kyzer Bretaña sang Philippine Army nga nakaangkon man sang pilas sa lawas.
Sa exclusive interview sang Bombo Radyo sa witness nga si Carlos Guadalupe, iya ginpahayag nga nakita niya ang biktima nga nagapadulong sa tyangge samtang ang motorsiklo naman ang naghalin sa bahin sang Nabitasan, Leganes, Iloilo.
Suno sa natungdan, nakibot na lang siya sang gulpi nga naglagapok kag nakit-an na niya nga nagahayang na sa dalan ang biktima.
Suno naman kay PSSGT John Mark Tuazon, imbestigador sang Leganes Municipal Police Station,gina-check pa nila ang CCTV sa lugar agud mahibaluan kun paano gid man natabo ang insidente.
Ginpahayag nga matapos nabungguan, gindusdos pa sang motor sang ginabanta 30 metros ang biktima.
