ILOILO CITY- Ginpasiguro sang Kongreso nga indi mabutang sa alang-alang ang national security kadungan sang pagpirma ni Presidente Rodrigo Duterte sa 85-year-old Commonwealth Act No. 146, ukon ang Public Service Act, nga magahatag na sang full foreign ownership sa mga telecommunications, airlines, kag railways.
Sa interview sang Bombo Radyo Iloilo kay House Deputy Speaker kag Economic Affairs Committee Chair Rep. Sharon Garin, iya ginpahayag nga napanumduman na nila sang maayo ang nasambit nga layi kaupod ang iya nga senate counterpart nga si Sen. Grace Poe kun sa diin katuyuan nila nga makahatag sang mas madamo nga trabaho sa mga Pilipino nga indi mabutang sa alang-alang ang seguridad sang pungsod.
Suno sa iya, ang nasambit nga tikang ang makahatag sang alagyan agud makabayluhanay sang ideya ang mga dumuluong kag mga Pilipino para sa pag-uswag sang pungsod sa tunga sang pandemya.
Gin-athag naman sang mamalidha nga indi mahimo nga makapanag-iya ang mga dumuluong sang public utility vehicles, water, electricity, petroleum pipelines, kag seaports sa pungsod.
Nahibaluan nga ang Chief Executive Officer sang SpaceX nga si Elon Musk kag ginbansagan nga world’s richest person ang nagpahayag man sang interes nga magbutang sang satellite internet services sa Pilipinas.
Suno sa mamalidha, nagapakigsugilanon na si Musk sa mga ahensya sang gobyerno tuhoy sa iya mangin investment sa Pilipinas partikular sa sektor sang telekomunikasyon.
