ILOILO CITY – Nagpanawagan ang transport groups sa Western Visayas sa Land Transportation Franchising and Regulatory Board (LTFRB) kag Department of Transportation (DOTr) nga palawigon pa ang deadline sang pagpasa sang jeepney drivers sang rekisitos para sa modernization program.
Sa interview sang Bombo Radyo kay Mr. Reymundo “Boyet” Parcon, presidente sang Iloilo City Loop Alliance of Jeepney Operators and Drivers Association (ICLAJODA) kag subong man chairman sang Western Visayas Transport Cooperative (WVTC), iya ginpahayag nga sini na nga Marso 24 ang deadline sang consolidation sang kooperatiba kag korporasyon para sa PUV modernization program.
Suno kay Parcon, na-delay sa pagproseso sang mga rekisitos ang iban nga mga operator bangud wala sang financial capacity nga P20,000 kada unit.
Ang P20,000 ang magaserbe nga ‘show money’ ukon collateral kun sa diin, ini ang idiretso sa bangko.
Pahayag dugang ni Parcon, ang ginakahangaw-an sang mga jeepney drivers kag operators amo nga matapos lang ang Abril 1 apang wala pa sila sa gihapon nakaproseso sa pagkuha sang prangkisa para sa modernization program bilang kabahin sang implementasyon sang Local Public Transport Route Plan (LPTRP).
Kun matabo ini pahayag ni Parcon, indi na makabyahe ang mga driver sang depampasahero nga jeep sa tion nga ma-implementar ang LPTRP.
Pabor man si Parcon sa ginpasa nga resolution sang Sangguniang Panlalawigan nga nagahingyo sa Iloilo City council nga i-suspende ang implementasyon sang LPTRP agud nga indi na mabudlayan ang jeepney drivers sa pagsaylo sa modernization program.
