ILOILO CITY – Ginsunog sang ginapatihan myembro sang New People’s Army (NPA) ang 13 ka mga motorsiklo nga ginapanag-iyahan sang CAFGU, personnel sang Army kag civilian sa Sitio Sobrehan, Brgy. Igcabugao, Igbaras, Iloilo.
Sa interview sang Bombo Radyo kay Cpt. Kim Apitong, spokesperson sang 3rd Infantry Division sang Philippine Army, iya ginpahayag nga lima ka mga myembro sang rebelde nga may bitbit nga armas ang nagpalapit sa lugar kun sa diin naka-park ang mga motor.
Dugang pa ni Apitong, gintayaan sang armas ang tag-iya sang balay malapit sa nahamtangan sang motor kag gilayon nga ginsunog ang mga ini.
Ang mga motor ang nahamtang isa ka kilometro halin sa patrol base sang CAFGU.
Pahayag dugang ni Apitong, ang lugar nga nahamtangan sang motor ang nagaserbe nga parkingan bangud tama ka ligwin sang lugar.
Samtang, sa interview sang Bombo Radyo kay PLt. Rodel Pasion, hepe sang Igbaras Municipal Station, iya ginpahayag nga indi pa sila makahatag sang tul-id nga impormasyon bangud indi pa sila mahimo nga makasaka sa lugar bangud padayon pa ang clearing operation sang Philippine Army.
Suno kay Pasion, nagpadulong sila sa lugar kaupod ang Bureau of Fire Protection (BFP) apang ginpabalik sila agud nga indi ma-hamper ang clearing operation sang mga suldado.
Sa inisyal nga impormasyon nga nabaton sang Igbaras Municipal Police Station nagikan sa 61st Infantry Battalion sang Philippine Army, may yara sang mga kalalakinhan nga nagsunog sang 13 ka mga motorsiklo nga ginapanag-iyahan sang myembro sang CAFGU Active Auxiliary nga nadestino sa lugar.
Ang motorsiklo ang naka-park sa atubang sang balay ni Mr. Elario.
Suno sa report sang army, gintayaan pa sang armas si Mr. Elario kag ginkuha ang iya home made 12 gauge shot gun samtang ang tatlo ka iban pa ang nagsunog sang motor kag gilayon ang mga ini nga nagpalagyo.
Sa record sang Igbaras Municipal Police Station, sang July 2009, may ginsunog man ang mga rebelde nga delivery van sang sigarilyo kag sang December 2015, ginsunog man ang heavy equipment sa amo nga banwa.
