ILOILO CITY- Positibo ang Panay Railways Incorporated nga madayon na gid man ang madugay na nga plano nga pag-rehabilitate sang nasambit nga railway system nga magakonekta sa Iloilo kag iban nga probinsya sa Panay.
Ini kasunod sang pagpirma ni Presidente Duterte sang amended Public Service Act nga nagahatag sang kahigayunan sa mga foreign investors nga makapanag-iya sang kutob sa 100% sang mga public services kaangay sang telecommunications, railways, expressways, airports, kag shipping industries sa pungsod.
Sa interview sang Bombo Radyo kay Capt. Cesar Capellan, Chief Operating Officer (COO) sang Panay Railways Incorporated, iya ginpahayag nga sa pagkamatuod, may yara sang masobra lima ka mga kompaniya sa China ang madugay na nga interesado sa pagrehabilitate sang Panay Railway.
Suno kay Capellan, may yara man sila sadto sang ginpirmahan nga Memorandum of Understanding(MOU) sa sini nga mga Chinese firms apang napaslawan man ang mga ini nga malab-ot ang requirements nga nagalakip sang pagpasa sang feasibility study kag financial schemes sa proyekto.
Pila sa mga Chinese firms amo ang Shandong Dongyue International Trade and Economic Cooperation Co., Ltd.,China First Highway Engineering Co., Ltd., China Railways International Ltd., kag TRUCK Pacific Development Corp., kag may yara pa sang iban.
Pahayag ni Capellan, sa subong, padayon ang pagbaton sang ila opisina sang dugang nga firms nga interesado sa proyekto nga ginalauman nga gastuhan sang masobra sa P16 billion.
Ang Phase 1 amo ang Iloilo City to Roxas City kag ang Phase 2 amo ang Roxas City to Caticlan, Aklan.
