Luyag nga suguran sang gobyerno ang implementasyon sang expanded Libre Sakay program sa Abril suno sa Land Transportation Franchising and Regulatory Board (LTFRB).
Suno kay LTFRB Executive Director Maria Kristina Cassion, ginahulat na lang sang ahensya nga matapos ang pag-download sang pondo nga allocated sa third tranche sang Service Contracting Program (SCP).
Nauna na nga gin-anunsyo sang Department of Budget and Management (DBM) nga ila na na-release sa Department of Transportation (DoTr) ang P7-billion para sa implementasyon sang amo nga programa.
Sa idalom sang service contracting program, ang operators kag drivers nga magapartisipar sa Libre Sakay program ang makabaton sang one-time payout nga P4,000 kag weekly payments base sa kilometro sang ila nga byahe sa sulod sang isa ka semana.
Ginalantaw man sang transport department nga madamo sa mga drivers ang magapartisipar sa amo nga programa bangud man sa madinaglag-on sini nga resulta sang 2020 kag 2021.
Ginabanta nga nagdangat man sa 44 million ang mga pasahero nga nakabenipisyo sa amo nga servicing program.
