ILOILO CITY- Nagpaandam ang isa ka public health expert angot sa risgo nga dala sang tuman ka mainit nga panahon kadungan sang summer season.
Sa interview sang Bombo Radyo kay Dr. Philip Ian Padilla, Vice Chancellor for Academic Affairs sang University of the Philippines Visayas, iya ginpahayag nga bangud sa tuman ka init, madasig ma-dehydrate ang tawo kag kun mapabay-an, ini ang mahimo magresulta sa pagkalipong, heat stroke, kag ang pinakamalala amo ang kamatayon.
Suno kay Dr. Padilla, pila man ka seryoso nga komplikasyon sang dehydration amo ang paghabok sang utok ukon cerebral edema, seizures, low blood volume shock, kidney failure, coma kag kamatayon.
Panugyan ni Padilla,dapat nga likawan ang pagbulad sa idalom sang adlaw sa tunga-tunga sang 12:00 sa udto tubtob 2:00 sa hapon bangud diri masami ang peak sang heat index.
Mas maayo man nga magsuksok sang bayo nga komportable kag indi gid magkalipat sa pag-inom sang madamo nga tubig.
