ILOILO CITY – Nagahulat pa sang guidelines ang Department of Social Welfare and Development (DSWD)- Region VI angut sa ayuda sang gobyerno nga P500 para sa mga pigado nga Pilipino bangud sang epekto sang oil price crisis.
Sa interview sang Bombo Radyo kay May Castillo, spokesperson sang DSWD- Region VI, iya ginpahayag nga sa subong, wala pa sila sang may nakaptan nga pagsulundan nagikan sa central office sa implementasyon sang nasambit nga programa.
Suno kay Castillo, ang ayuda ang posible nga mabaton sang mga benepesyaryo pinaagi sa ila nga card sa tagsa ka bulan.
Dugang pa ni Castillo, indi pa mapat-ud kung sin-o ang mangin benepesyaryo sang P500.
Kung madumduman, sang Marso 21, ginmanduan ni Presidente Rodrigo Duterte ang Department of Finance (DOF) nga pasakaan sa P500 ang ayuda nga ihatag sa mga pigado nga pamilya sa pungsod kasunod sang pagbasura sang request nga suspendihon ang excise tax sa presyo sang gatong.
Suno naman kay Finance Secretary Carlos Dominguez, indi masarangan sang gobyerno nga i-sustain ang nasambit nga ayuda.
Suno naman sa presidente, bahala na ang masunod nga presidente kun sa diin niya kawaton ang budget agud mapadayon ang P500 nga ayuda para sa mga pigado nga pamilya sa tagsa ka bulan.
