Apisar lisensyado ang armas kag may ginpakita nga permit to carry, wala nakalusot sa election gun ban ang 34-anyos nga negosyante nga nadakpan sa Barangay San Vicente, Leganes, Iloilo.
Ang arestado amo si Jovan Jimenez, residente sang banwa sang Sta. Barbara.
Sa interview sang Bombo Radyo kay Police Major Joven Arevalo, hepe sang Leganes Municipal Police Station, iya ginpahayag nga nakuha nagikan sa salakyan ni Jimenez ang isa ka caliber 40 nga armas kag duha ka magazine.
Gin-athag sang pulis nga may lisensya ang armas ni Jimenez kag may yara man ini sang dala nga permit to carry, apang wala ini sang valid certificate of authority nga amo ang required sa idalom sang COMELEC Resolution 10728.
Sa pagsulundan sang COMELEC, tubtub sa Hunyo 8 ukon sa bilog nga duration sang election gun ban, suspendido ang validity sang tanan nga permits to carry firearms magluwas lang sa may yara dala nga valid certificate of authority halin sa poll body.
Napasakaan sang kaso ang amo nga lalaki bangud sa paglapas sa Comelec resolution no. 10728 kag Republic Act 10591 apang nakatigayon man nga makapyansa.
