ILOILO CITY – Wala sang may nabaton nga reklamo ang Commission on Elections (COMELEC)- Iloilo City sa una nga adlaw sang kampanya sa local elective positions, kahapon, Marso 25.
Sa interview sang Bombo Radyo kay Mr. Jonathan Sayno, Election Assistant II sa COMELEC-Iloilo City, iya ginpahayag nga padayon ang pag-monitor sang ila opisina sa mga aktibidad sang mga kandidato sa ginapatigayon nga in-person campaign.
Suno kay Sayno, wala pa sang political group nga nagpatigayon sang grand rally kahapon nga adlaw apang may duha na nga nagkuha sang permit sa local government unit kag nagpahibalo sa COMELEC.
Subong nga aga, may patigayunon nga caravan si former mayor Joe Espinosa III nga nagapadalagan sa pagka-kongresista samtang karon sa gab-i, may patigayunon man nga grand rally ang grupo ni Iloilo City Mayor Jerry Treñas.
Nagpahanumdom naman si Sayno sa mga botante nga hibaluon sang maayo ang track record sang mga nagapadalagan kag ang election ang maga-agi lamang gani indi magpadala-dala sa emosyon.
