Ginatun-an sang Department of Trade and Industry (DTI) kun aprubahan ang request nga pasakaon ang presyo sang 33 ka basic necessities and prime commodities (BNPC) sa pungsod.
Suno kay Trade Secretary Ramon Lopez, lakip sa 33 ka mga produkto amo ang gatas, canned goods kaangay sang sardinas, kag meatloaf.
Ginalantaw na sang Consumer Protection Group sang ahensya ang posible nga adjustment sa presyo. Ginpahayag ni Lopez nga ginhingyo ang price increase bangud sang epekto sang pagsaka sa presyo sang produktong-petrolyo.
Halin sang nag-umpisa ang Russian invasion sa Ukraine, apisar nga naglala man ang pagsaka sang presyo sang gatong sa Pilipinas, wala pa sang nagsaka sa presyo sa basic necessities and prime commodities suno sa DTI.
Enero 2022 sang ulihi nga naghatag ang DTI sang updated nga suggested retail prices (SRP) para sa BNPCs kaangay sang canned goods, food products, bottled water, dairy, kag komon nga mga galamiton sa balay kag sa kusina.
Una na nga ginpahayag ni DTI Assistant Secretary Ann Cabochan nga wala sang ginalantaw nga ipatuman nga price freeze sa basic necessities.##
