ILOILO CITY- Nag-umpisa na subong nga adlaw ang pagpatuman sang 4-day work week scheme sa Iloilo City Hall kag Iloilo Provincial Capitol.
Nahibaluan nga ang nasambit nga scheme ang ginrekomenda sang National Economic and Development Authority (NEDA) sa tunga sang nagapadayon nga krisis dala sang pagtimbuok sang presyo sang gatong bangud sa inaway sa tunga sang Ukraine kag Russia.
Sa interview sang Bombo Radyo kay Iloilo City Mayor Jerry Treñas, iya ginpahayag nga maga-operate ang City Hall umpisa las 7:00 sang aga tubtob las 6:00 sang hapon, humalin Lunes tubtob Huwebes.
Gin-athag man sang alkalde nga indi naman kinahanglan ang overtime pay para sa mga empleyado nga sakop sang scheme bangud wala man ginpasobrahan sa 40 hours ang ila nga oras sa pag-trabaho.
Suno kay Treñas, ang mga empleyado naman nga nagakinahanglan magpabilin sa pagtrabaho sa sulod sang lima ka adlaw nga schedule amo ang yara sa district health centers, personnel sang Public Safety and Tranportation Office (PSTMO), City Engineer’s Office kag iban pa nga yara sa mga opisina nga naga-provide sang essential services.
Ang city-owned modern jeepneys kag mga bus ang magadul-ong kag sugat sa mga empleyado sang Iloilo City Hall halin sa ila tagsa ka district plazas.
Sa bahin naman sang Iloilo Provincial Capitol, ginpahayag ni IIloilo Gov. Arthur Defensor ,Jr. nga tanan nga serbisyo kag transaksyon ang magapabilin nga fully operational humalin Lunes tubtob Byernes, 8:00AM tubtob 5:00PM.
Suno sa iya,magapatuman sang Alternative Work Arrangements kun sa diin may yara sang kombinasyon sang apat ka adlaw nga trabaho kaangay sang Lunes tubtob Huwebes; Martes tubtob Byernes ukon Lunes-Martes kag Huwebes-Byernes agud nga indi mauntat ang transaksyon sa probinsya.
