ILOILO CITY- Gin-aprubahan na sang National Seed Industry Council (NSIC) ang 15 ka bag-o nga inbred rice varieties para sa commercial release.
Walo sa sini nga mga varieties ang gin-develop sang Philippine Rice Research Institute (PhilRice).
Tatlo diri ang para sa irrigated lowland kag lima ang para sa special purpose pigmented non-glutinous.
Ang pito naman ka varieties nga aprubado na ang gin-breed sang International Rice Research Institute (IRRI).
Lima diri ang para sa irrigated lowland, isa ang zinc-biofortified ,kag ang isa ang para sa rainfed lowland.
Suno kay Dr. Oliver E. Manangkil, senior plant breeder sang Department of Agriculture (DA)-PhilRice, kadungan sang bag-o nga rice varieties, may pilian na ang mga mangunguma kun ano nga klase ang nagakabagay sa kondisyon sang ila talamnan.
Ini nga mga varieties ang iga- introduce sa mga mangunguma paagi sa techno-demo farms sa idalom sang mga extension programs sang DA-PhilRice kag mga branch stations sini.
