ILOILO CITY – Nagdangat na sa masobra 50% sang kabarangayan sa syudad sang Iloilo ang gin-deklarar nga drug-free sang Philippine Drug Enforcement Agency (PDEA).
Sa interview sang Bombo Radyo kay Iloilo City Mayor Jerry Treñas, iya ginpahayag nga nagdangat na sa 51% ang drug cleared barangays ukon 92 sa 180 ka barangay sa syudad matapos nga nadugangan sang apat ka mga barangay ang drug cleared sa ginpatigayon nga deliberation sang Regional Oversight Committee.
Ang apat ka mga barangay amo ang San Pedro, Jaro; Magdalo sa La Paz; Rizal Lapuz, Sur kag Villa Anita sa City Proper.
Suno kay Treñas, nagapadayon ang mga programa sang syudad agud nga dalayon nga madula na ang iligal nga droga sa syudad kag ma-clear na ang tanan nga barangay batuk sa iligal nga droga.
Ang Regional Oversight Committee ang ginabug-usan sang PDEA- VI, Police Regional Office (PRO)- VI, Department of Health (DOH)- VI, kag Department of Interior and Local Government (DILG).
