ILOILO CITY– Ginklaro sang Department of Agriculture nga wala sang high-ranking government officials kag DA officials nga involve sa illegal importation ukon smuggling activities sa agricultural products sa pungsod.
Ini ang kasunod man sang ginpatigayon nga senate hearing sang Lunes angut sa nagapadayon nga smuggling sang agricultural products nagikan sa China nga nagaresulta sang minilyon nga kapyerdehan sa mga local farmers sa tagsa ka adlaw.
Sa exclusive interview sang Bombo Radyo kay Department of Agriculture (DA) Assistant Secretary Noel Reyes, iya ginpahayag nga basi man sa nangin pahayag ni Asst. Secretary Federico E. Laciste Jr., ang Assistant Secretary for the DA-Wide Field Inspectorate, may mga negosyante nga nagatawag kay Laciste kag ginagamit ang pangalan sang mga pulitiko kag mangin sang mga opisyal sang ahensya.
Ginklaro man ni Reyes nga wala sang opisyal sang ila nga ahensya nga na-angot sa smuggling activities.
Sa subong suno kay Reyes, ginaimbestigaran na ini sang Department of Agriculture.
Kabahin sang mga gina-smuggle nga mga produkto amo ang mga utan, mga isda kag mangin ang mga processed meat.
Padayon man ang operation sang Department of Agriculture batuk sa smuggling activities kaupod ang Bureau of Customs (BOC).
Sa tion nga madakpan ang isa ka importer nga naga-smuggle sang produkto, gilayon ini nga gina-black list kag ginapasakaan sang kaso sang BOC kun makapila na ka beses nga ginsulit.
“DAKO ANG MABULIG SANG X-RAY MACHINES”
Samtang, madugay na nga ginasuhestiyon sang Department of Agriculture nga dapat maggamit sang digital kag x-ray machines ang gobyerno agud nga machekyar sang maayo ang tanan nga mga naga-agi sa ports kag sea ports.
Suno kay Department of Agriculture (DA) Assistant Secretary Noel Reyes, iya ginpahayag nga indi makita sa gilayon ang mga smuggled products kun manu-mano ang pag-inspect ang ahensya kag sang Bureau of Customs.
May yara man sang dalagko nga vans suno sa natungdan gani indi malantaw sang maayo kag posible yara sa pinakasulod sang salakyan ang mga illegally imported products.
Imposible na suno sa natungdan nga ma-isa-isa chekyar ang sulod sang van ilabi na nga sa sagwa gid lamang ang ginalantaw sang inspector.
“WALA SANG FORMALIN NGA GINABUTANG SA UTAN”
Indi matuod nga may yara sang formalin ukon iban pa nga sahi sang kemikal nga ginabutang sa mga smuggled products.
Suno kay Department of Agriculture (DA) Assistant Secretary Noel Reyes, wax gid lamang ang ginabutang sa mga produkto agud nga maghining ang panit kag mag-extend ang shelf life kag wala ini sang hilo.
