ILOILO CITY- Nagapabilin sa kustodiya sang Criminal Investigation and Detection Group (CIDG) Regional Field Unit 6 si Bagong Alyansang Makabayan (BAYAN) Panay Secretary-General Elmer Forro.
Si Forro ang gin-dakop sa gahum sang warrant of arrest sa kaso nga murder kag multiple attempted murder kaangot sa natabo nga ambush sa Barangay Panuran, Lambunao, Iloilo sang Abril 7, 2020 sa diin isa ka soldado ang napatay nga si Private First Class Mark Nemis sang Madalag, Aklan kag myembro sang 301st Infantry Brigade sang Philippine Army.
Sa interview sang Bombo Radyo kay PLtCol Arnel Solis, spokesperson sang Police Regional Office (PRO) 6 , iya ginpahayag nga magluwas kay Forro, subject man sa amo nga warrant si Karl Teodosio, leader sang SYP Baloy Platoon sang NPA Komiteng Rehiyon-Panay Central Front nga gintudlo sang mga testigo nga nagpanguna sa pag-atake sa tropa sang gobyerno.
Suno kay Solis, sa subong, ginaproseso na ang documentation kay Forro agud nga mapresentar na ini sa publiko kag maturn-over sa korte nga concerned agud matigayon na ang nagakaigo nga pagkustodiya sa iya.
Matandaan nga gindakop si Forro sa iya ginatiniran nga balay sa Cabatuan, Iloilo.
