ILOILO CITY – Kun ano ka law-ay sang hitsura, amo man ka law-ay ang batasan ni mayoral candidate Salvador “Jun” Capulot.
Ini ang reaksyon ni MH Del Pilar Punong Barangay Larry Palomo sang gintawag siya nga tampuhaw sa ginpatigayon nga caucus sang grupo nanday Capulot sa Zone 3 sang amo nga barangay.
Sa interview sang Bombo Radyo kay Palomo, ginhatagan niya sang permit ang kampo ni Capulot nga magpatigayon sang rally sa ila barangay apang ginmulay siya sini sa atubang sang iya pumuluyo.
Ginpahayag ni Capulot nga gina-ipit sang punong barangay ang mga senior citizen kag ginapasirad-an ang ila kooperatiba.
Depensa naman sang punong barangay, may tax ordinance ang barangay gani obligado ang grupo sang mga senior citizen nga magbayad sang ila renta sa propyedad sang barangay.
Nakahanda naman si Palomo nga sabton ang panumbungon batuk sa iya.
Sa Facebook post naman ni anay councilor Plaridel Nava nga grupo ni Capulot, nagpa-blotter sila sa police station bangud ginapahayag nga gin-harass sila ni Punong Brgy. Larry Palomo.
