ILOILO CITY – Ginahanda na sang Passi City Police Station ang mga dokumento agud nga mag-file sang kaso batuk sa apat ka mga suspek nga nag-hold up sa empleyado sang isa ka hardware nga nahamtang sa banwa sang Calinog, Iloilo kun sa diin, masobra P1.5 million ang nataban nga kwarta.
Ang hold up incident ang natabo sang Marso 28 sa Brgy. Agdahon, Passi City.
Ang mga suspek amo sanday Carlos Alcarde, 44, Adrian Pineda, 25, nga yara na sa kustodiya sang kapulisan samtang padayon pa nga ginapangita sanday Antonio Alcarde, 60 anyos kag Teodoro Chavez, ginabanta masobra 50 anyos ang edad.
Sa interview sang Bombo Radyo kay Pol. Lt. Col. Dennis Pamonag, hepe sang Passi City Police Station, ang kaso nga i-file batuk sa mga suspek amo ang Robbery with Force Intimidation.
Dugang pa ni Pamonag nga sa apat ka mga suspek, si Pineda ang makabig nga master mind bangud siya ang nakahibalo sang tanan.
Si Pineda man mismo ang naga-drive sang motor nga amo ang nagbangga sa motor sang mga biktima samtang si Carlos Alcarde naman ang driver sang motor nga amo ang nagaserbe nga back up.
Sa masobra P1.5 million nga nataban sang mga suspek, naglab-ot na gid lamang sa P247,000 ang na-recover sang mga pulis.
