Madamo pa sang nangin alibi ang 16-anyos nga solterito sa Barangay Casalsagan, Pototan, Iloilo antes sini gin-ako ang pagpatay sa iya 13-anyos nga abyan sang nagligad nga Martes, Marso 29.
Kagab-i sang nagsungka sa pulis si Alias Dodoy kag gin-updan man ini sang iya nga mga ginikanan.
Ang biktima naman amo ang 13-anyos nga amigo sini nga ginmartilyo sa ulo sa sulod mismo sang ila nga balay sa Sitio Sinikway sa amo nga barangay.
Sa interview sang Bombo Radyo kay Raul Pachejo, Sr., amay sang biktima, iya ginpahayag nga duda na siya nga daan nga si Alias Dodoy ang suspek sa krimen bangud ginaalegar masami nga nagapangawat ini sang ginansiya sang computer shop kun sa diin naman nagabantay ang biktima.
Suno kay Pachejo, sang una nga ginpamangkot si Alias Dodoy kun sa diin siya sang nagligad nga Martes sang takna 12:00 pm tubtub 2:00 pm, nagarason ini nga nagatrabaho ini sa sandiyahan. Sang ginpamangkot ang tag-iya sang sandiyahan, ginapahayag nga wala man sang amo nga adlaw si Alias Dodoy sa ila.
Magluwas diri suno kay Pachejo, nakarason man si Alias Dodoy nga nanggabot ini sang monggo, nakahampang sang basketball, kag nakapagunting — butang nga wala man ginpatihan sang amay sang biktima.
Sang ulihi, sang ginpahog ini nga makit-an man gihapon ang fingerprints sa martilyo kag matumod kun sin-o ang nagpatay sa 13-anyos nga bata, maabtik si Alias Dodoy sa pagrason nga sang nahibaluan niya nga patay na ang iya abyan, gin-uyatan niya ang martilyo agud nga malantaw kun may dugo.
Suno pa kay Pachejo, masami man nga nagapalayo si Alias Dodoy kun ara na siya.
Sa inisyal nga impormasyon sang Bombo Radyo, indi na makaagwanta ang suspek kag nanugid man ini sa iya nga pamilya nga amo naman ang nagpakig-angot sa barangay kag nagtugyan sa pulis.
Yara na ini subong sa paghinakop sang Pototan Municipal Police Station.
Sa inisyal nga impormasyon, gin-claim sang suspek nga nagsunluganay sila sang iya nga abyan, tubtub nga may pahuganay, tubtub nga naglab-ot sa pagka-impito rason nga napatay gid niya ini.
Wala sang iban nga criminal record ang 16-anyos nga suspek. ##
