ILOILO CITY – Ginpanginwala sang nobya sang lalaki nga ginbuno, ginlabo kag ginkastigo sa Barangay Cabayugan, Badiangan, Iloilo nga may yara sang daan nga hiligut-anon ang biktima kag mga suspek.
Ang biktima amo si Romar Barrientos, residente sang Barangay Sinuagan, Badiangan, Iloilo.
Ang mga suspek amo ang mag-utod nga sanday Eugene Loceño, 18 kag Edzel Loceño 20; kag ang magtiyo nga sanday DJ Zambra, 17 kag si John Zambra 20 anyos.
Sa interview sang Bombo Radyo kay Alyas Gwyneth, nobya ni Barrientos, iya ginpahayag nga sa tion nga magkadto ang biktima sa lugar nila agud nga maglantaw sang basketball, naga istoryahanay man ang mga ini kag wala man sang may gin-awayan sang nagligad.
Suno kay Gwyneth, posible nga nahimo lamang sang mga suspek ang amo nga pagpangkastigo bangud sang kahulugbon.
Desidido naman nga magpasaka sang kaso ang pamilya sang biktima batuk sa mga suspek nga nagapabilin nga at large.
Kung madumduman, gindul-ong sang biktima si Alyas Gwyneth sang ginlambatan ang mga ini sang suspek kag ginpulihan kastigo.
Sa subong, nagapabilin sa ospital ang biktima kag yara na sa estable nga kondisyon.
Ginapreparar naman ang kaso nga frustrated murder batok sa apat ka mga suspek.
