ILOILO CITY- Ginpatpat sang political analyst ang pila sa mga rason kun ngaa nagaeksister sa gihapon ang political dynasty sa pungsod.
Sa interview sang Bombo Radyo kay Atty. Joenar Pueblo, Bombo Abogado, iya ginpahayag nga apisar nasaad sa konstitusyon ang pagdumili sa dinastiya sa pulitika sa pungsod, wala man ini nahatagan sang nagakaigo nga depenisyon.
Suno sa iya, mabudlay man ang paghimo sang layi nga magadumili sang political dynasty bangud kalabanan sa mga mamalidha ang magpamilya ukon magparyentehanay.
Pahayag ni Pueblo, reyalidad man sa pungsod nga kalabanan sa mga ginapili sang mga botante amo ang popular nga mga pamilya.
Dugang pa ni Pueblo, bangud sa demokrasiya, bisan wala pa sang matabo nga baklanay sang boto, magabase gihapon ang mga botante sa popularidad kag indi sa track record ukon panindugan sang kandidato sa mga isyu.
Bangud sini,suno pa kay Pueblo, kinahanglan nga handa man ang tawo nga agwantahon ang konsekwensiya sang iya boto.
