Nagapang-alang alang pa si Iloilo governor Arthur Defensor Jr. nga aprubahan ang ginaduso nga pagpatuman sang total ban sa pagsulod sang poultry products sa probinsya nagikan sa Luzon.
Ang Iloilo-Bacolod Association of Veterinary Sales Representatives (IBAVSR) ang nagduso sa provincial government nga i-ban ang tanan nga poultry products kaangay sang balut ukon table eggs, dressed chicken kag iban pa halin sa Luzon agud nga makudalan ang poultry industry sang probinsya batok sa avian influenza ukon bird flu.
Sa interview sang Bombo Radyo sa gobernador, iya ginpahayag nga ginbaton lang niya anay ang inputs nagikan sa grupo kag gin-validate ang mga ini.
Suno pa sa gobernador, kinahanglan nga balansehon man sang probinsya ang sitwasyon.
Una diri nga gina-konsiderar sang gobernador amo ang mahimo impact sang total ban sa ekonomiya sang probinsya.
Ginalantaw man sang gobernador kun bala, may yara sang bastante nga suplay ukon may kuhaan sang suplay sang poultry products diri sa probinsya ukon sa iban nga lugar sa gwa sang Luzon sa tion nga magpatigayon sang total ban.
Bangud sini, magasapol ang gobernador upod ang Department of Trade and Industry (DTI) kag Department of Agriculture (DA).
