ILOILO CITY – Nadayon ang ginapangayo nga break-up sex sang barbero sa iya ex-girlfriend antes nadakpan sa entrapment operation sang Criminal Investigation and Detection Group (CIDG) sa isa ka Drive-In Hotel sa Bolilao, Mandurriao, Iloilo City.
Ang arestado amo si Francisco Boteja Jr. sang Cabatuan, Iloilo.
Samtang ang biktima naman amo si alyas Ruffa, residente sang isa ka banwa sa Iloilo Province.
Sa exclusive interview sang Bombo Radyo kay Police Major Jess Baylon, chief sang CIDG-Iloilo City, iya ginpahayag nga nagahublas na ang lalaki kag babaye sa sulod mismo sang kwarto sang ila ginsulod.
Suno kay Baylon, antes ang entrapment operation, ginmanduan nila ang babaye nga mag-contact sa iya bilang signal nga sudlon na ang kwarto.
Apang natukiban nga ginkuha sang lalaki ang cellphone sang babaye rason nga wala ini naka-contact sa mga otoridad.
Diri na kag ginsulod sang mga otoridad ang hulot kag nakit-an nga hublas ang duha.
Nahibaluan nga nagreklamo ang babaye sa ila talatapan nga nagapangayo ang barbero sang P1 million bilang kabayaran sang apat ka tuig nga pagsagod sini sa iya anay nobya.
Apang, bangud indi masarangan sang tagreklamo nga bayaran ang amo nga kantidad, nagpangayo nalang ini sang P500, 000 kag “breakup sex”.
Dugang pa ni Baylon, ginpahog pa sang lalaki ang tagreklamo nga patyon ini kag ang iya pamilya sa tion nga indi ini makabayad.
Pahayag dugang ni Baylon nga ginapalapta sang barbero ang mga nude pictures sang tagreklamo samtang nga naga-ilis ini.
