ILOILO CITY – Mahimo na nga ma-verify sang mga bangko kag iban pa nga establishments ang PhilSys national ID gamit ang QR code system matapos nga ginlunsyar sang Philippine Statistics Authority ang ‘PhilSys Check’ .
13 ka mga bangko ang nangin kabahin sang pilot test run sa PhilSys Check QR Code kun sa diin, mahimo na nga ma-verify ang identity sang registered national ID cardholders samtang nga naga-transfer sang personal data sa system nga indi na kinahanglan ang manual encoding.
Suno kay Assistant National Statistician Fred Sollesta, ginpatigayon ang pilot testing sang nagligad nga tuig.
Ang ini nga programa ang may katuyuan nga mas mapadasig pa ang transakyon sa tunga sang gobyerno kag private services kag mangin accessible para sa publiko.
Sang Marso, naglab-ot na sa 9.1 M nga PhilIDs ang na-deliver sang PSA kag nagalaum nga maka-deliver pa sang 31.3 million nga IDs sa katapusan sang tuig.
Suno naman kay Assistant National Statistician Rene Mendoza, may yara sang ginabanta 62 million ka mga ID ang kinahanglan nga i-proseso kag ang target amo nga makaproseso sang 92million sa katapusan sang tuig.
Nagapadayon subong ang pag-develop sang mobile application agud nga ang mga ID holders ang mahimo nga maka-store sang ila detalye diri samtang ang actual cards naman ang padayon nga gina-imprinta.
Ang isa pa ka proposal amo nga mag-download sang digital version sang ID para sa printing.
Nagalaum naman ang PSA nga masolbar na ang mga problema kag indi na kinahanglan sang tawo ang physical IDs.
Apang suno kay Mendoza, padayon pa nga gina-review sang ahensya ang mga downloadable credentials bangud may yara pa sang security kag data privacy concerns rason nga wala pa ini gin-anunsyo sa publiko.
