ILOILO CITY – Nagahulat pa ang mga vendors sa La Paz market sang pinal nga plano sang relocation site bangud sang patigayunon nga renovation sa nasambit nga merkado.
Sa interview sang Bombo Radyo kay Charlie Chan, Federation president sang market vendors association sa syudad, iya ginpahayag nga wala pa sang klaro nga itsura ang ila pagasayluhan.
Suno kay Chan, ang una nila nga nahibaluan amo nga 2 meters by 2 meters ang kadakuon sang ila salayluhan nga tama naman ka gamay para sa ila.
Apang, suno kay Chan, indi pa ina sigurado bangud wala pa na-finalize.
Nagahulat naman sila nga sapulon sang Local Economic and Enterprise Office (LEEO) angut sa renovation sang merkado.
Sa subong, may yara na sang ginapatuman nga adjustment sa traffic plan sa palibot sang La Paz public market.
Sa interview naman sang Bombo Radyo kay Maricel Mabaquiao, head sang LEEO, iya ginpahayag nga ginapanan-aw nga magasugod na ang renovation sang mga merkado sa ikaduha nga quarter subong nga tuig.
Sa La Paz, ginahulat pa ang local ordinance antes ang pagtukod sang temporary nga relocation site sang mga vendors nga ubrahon sang contractor sa masunod nga semana.
Ang fish section suno kay Mabaquiao ang indi na pag i-relocate.
Nagpasalig naman ang natungdan nga indi paggub-on ang merkado kun wala pa sang temporaryo nga sayluhon ang mga vendors.
Nahibaluan nga natalana nga ipaidalom sa renovation ang mga merkado sa La Paz, Jaro Big, Mandurriao kag Arevalo.
