ILOILO CITY- Kargado sa rason si Cabatuan, Iloilo Mayor Ronilo Caspe kasunod sang reklamo batok sa quarry operation sa suba sa Tigum River sa Brgy. Salacay sa amo nga banwa kun sa diin ang Local Government Unit (LGU) ang ginatudlo nagpamuno sa pag-quarry.
Sa interview sang Bombo Radyo kay Mayor Caspe, iya ginpahayag nga legal ang ginapatigayon nga operasyon bangud may yara sang Gratuitous Permit ang banwa halin sa Provincial Environment and Natural Resources Office (PENRO) kag epektibo ang permit sa sulod sang tatlo ka tuig.
Suno kay Caspe, nasaad sa permit nga indi lang re-channeling ang ila pwede patigayunon kundi mahimo man sila mag-quarry sang sand kag gravel agud magamit sa mga proyekto sang LGU kaangay sang farm to market road kag mga building sa barangay kag banwa.
Pahayag ni Caspe, kun may yara gid man sang violation sa operasyon, ang PENRO mismo ang una nga magasaway ukon magpapanaog sang penalidad ukon cease and desist order.
Gin-ako naman ni Caspe nga magluwas sa mga proyekto sa Cabatuan, nagakuha man sang balas sa Tigum River agud gamiton sa mga ginakay-o nga provincial road.
Apang suno sa alkalde, diutay lang ini kag kabahin lang sang pagpasalamat banwa bangud sa pagpahulam sang probinsya sang loader nga kargahan sang balas bangud nga naguba ang loader sang banwa.
