ILOILO CITY- Wala gid sang tuman ka dako nga epekto sa supply sang poultry products kag egg products sa Iloilo City ang duha ka semana nga temporary ban sang sini nga mga produkto.
Ini kasunod sang gin-isyu ni Iloilo City Mayor Jerry Treñas nga Executive Order No. 41-A nga nagadumili sang pagpasulod sang manok, pating, pato, kag iban pa nga sahi sang pispis lakip na ang egg products halin sa Luzon bangud sa kahangawa nga dala sang Avian flu matapos narecord ini nga balatian sa mga sapat sa Bulacan, Pampanga, Nueva Ecija, Tarlac, Bulacan, Laguna, Bataan, Benguet kag mangin sa Mindanao partikular sa Sultan Kudarat, North Cotabato kag Davao del Sur.
Sa interview sang Bombo Radyo kay Dr. Tomas Forteza, Iloilo City Veterinarian, iya ginpahayag nga base sa ila pag-check sa mga nagapangompra sang sini nga mga produkto nga halin sa Luzon, may yara pa sang stocks nga nakasulod sa syudad antes ginpatuman ang ban.
Nahibaluan nga base sa executive order, ginadumilian ang pagtransport sang tanan nga species sang pispis, poultry man ukon non-poultry magluwas lang sa day-old breeder chicks, day-old pullets, kag hatching eggs halin sa Luzon.
Dumilian man ang pagtransport sang mga pating ukon pigeons nga gamiton para sa pagpalupad, racing, training, breeding kag amo man ang pagtransport sang mga manok nga gamiton sa bulang nga halin sa Luzon.
Magluwas diri, indi man pagtugutuan ang pagtransport sang pato kag pugo nga halin sa mga probinsya nga may narecord nga Avian flu.
Mangin ang table eggs, salted eggs, quail eggs, kag balut halin sa Luzon ang indi man makasulod sa Iloilo City.
Suno kay Forteza, ang “temporary ban” nga nagsugod sang Abril 20 kag magalawig tubtob Mayo 7 ang tikang sang syudad agud indi na maglapta
Ang avian influenza nga ginakabig nga makalalaton nga viral disease nga naga-apekto sa mga manok, pating, pato kag iban pa nga sahi sang pispis.
Samtang, gin-ako naman ni Forteza nga posible nga kulangon gid man ang suplay sang balut bangud 90% sini ang nagahalin sa Luzon kag 10% lang ang halin sa local producers diri sa Iloilo.
