ILOILO CITY – Posible nga nagdumot na ang 16 anyos nga suspek nga nagbuno sa iya amay sa Brgy. Badlan Pequeño, Calinog, Iloilo.
Ang biktima amo si Leo Libuna, 56, residente sang nasambit nga lugar.
Sa interview sang Bombo Radyo kay PMaj. Dadjie Delima, hepe sang Calinog PNP, iya ginpahayag nga base sa panaysayon sang iloy, indi paghimuon sang suspek ang amo nga krimen kun wala ini sang kaugot sa iya amay.
Suno pa kay Delima, sa una nga imbestigasyon, nagpauli nga hubog ang biktima sa ila balay kag nagpangayo sang lighter.
Apang, sining ulihi, gintuad sang suspek nga ginsipa siya sang iya amay rason nga naimpito ini kag ginsakyan sa dughan ang iya amay kag ginhatuk-hatuk sang labo.
Samtang, ginapreparar naman sang Calinog PNP ang kaso parricide batuk sa suspek nga yara karon sa kustodiya sang Crisis Intervention Unit sang Calinog Municipal Social Welfare and Development Office.
Samtang, ipaidalom naman sa psychological debriefing ang 9-anyos nga bata sang biktima nga amo ang nakakita sang krimen.
