ILOILO CITY- Yara na sa final training ang Comission on Elections (COMELEC) sa tanan nga magabug-os sang Board of Election Inspectors (BEIs) para sa May 9,2022 national and local elections.
Sa interview sang Bombo Radyo kay Atty. Hazel Palencia,Regional Election Attorney sang COMELEC Region 6, iya ginpahayag nga kabahin sang last stretch sang preparasyon sang mga BEIs amo ang paghitso sang contingency plan sa tion nga may matabo nga problema sa vote-counting machines, SD card kag transmission media.
Suno kay Palencia, sa BEIs kag sa mga technical support staff nga magaserbe sa tion sang eleksyon nagasandig ang talunsay nga dalagan sang eleksyon sa Mayo 9.
Sa subong suno kay Palencia, isa man sa ila ginatutukan amo ang pagpasiguro sang stable nga power supply sa mga polling precincts agud malikawan ang delay sa binotohay.
Samtang, ginkumpirma naman ni Palencia nga magaabot subong nga adlaw ang 5 million official ballots para sa Western Visayas.
Ang rehiyon may yara sang 5,826, 482 registered voters para sa Mayo 2022 elections.
