Positibo ang Department of Education (DepEd)- Schools Division of Iloilo nga madugangan pa gid ang mga eskwelahan sa probinsya nga makabalik sa limited face-to-face classes ilabi na kun maka-comply ang tanan sa gin-revise nga School Safety Assessment Tool (SSAT).
Ang SSAT amo ang ginagamit agud nga matakos ang kahandaan sang isa ka eskwelahan sa pagbalik sang face-to-face classes.
Sini lang nga semana, gin-anunsyo sang DepEd nga gin-revise sini ang amo nga assessment tool kag ginpatutok subong sa apat ka mga area nga amo ang: pag-manage sa school operations; pagtudlo kag pagtuon; well-being and protection; kag school-community coordination.
Sa idalom sang ‘managing school operations’, kinahanglan nga makabaton ang eskwelahan sang suporta gikan sa community stakeholders.
Kinahanglan man nga magpatigayon sang simulation activities sa mga school personnel may kaangtanan sa pagpatuman liwat sang in-person classes.
Dapat nga may yara man sang bastante nga learning resources nga kinahanglan sa expansion kag sa class programs.
Sa interview sang Bombo Radyo kay Leonil Salvilla, spokesperson sang DepEd Schools Division of Iloilo, iya ginpahayag nga kinahanglan nga present gid sa isa ka eskwelahan ini nga apat ka component bangud indi maaprubahan kun kulang ang isa ka area.
Sa subong, 80 pa lang ka mga eskwelahan sa Iloilo Province ang nakabalik sa limited face-to-face classes.
May yara sang 289 pa ka panibag-o nga mga eskwelahan nga gin-rekomendar ang Schools Division of Iloilo para sa resumption kag gina-evaluate na sang Regional Screening Committee. ##(Photo: Rappler)
