Pahanumdom sa mga nagapanag-iya sang swimming pool: ‘Siguraduha gid nga indi sige-sige ang pagtubod sang tubig sa inyo nga pool!’
Ini ang leksyon nga natun-an sa isa ka eskwelahan sa Japan matapos nga nagdangat sa $27,000 ukon P1.4 million ang balayran sini para sa tubig matapos hungod nga ginbilin sang isa ka manunudlo nga bukas ang pump sang tubig sa swimming pool sa sulod sang pila ka bulan.
Ginrason sang wala ginhingadlan nga manunudlo nga maayo ang fresh water sa swimming pool kontra sa COVID-19.
Ini ang iya ginpanumdom rason nga ginpabay-an nga nagatubod lang ang tubig halin sa bulan sang Hunyo tubtub sa Septyembre.
Suno kay local education board official Akira Kojiri, may chlorine kag filtering machines nga ginagamit agud nga matinluan ang tubig sa swimming pool, apang posible suno sa iya nga ginpanumdom sang manunudlo nga ang pagpatubod lang sang bag-o nga tubig amo ang nagaisahanon nga paagi agud nga mapunggan ang Covid.
Pila man ka staff sa eskwelahan ang nakakita nga nagatubod ang tubig sa pool kag ginapatay man nila ang pump, apang natukiban sang ulihi nga nagamato-mato gid ang manunudlo agud nga buksan ang pump.
Bangud sini, naglab-ot sa 4,000 tonelada sang sobra nga tubig ang nagamit sa pool sa sulod sang duha ka bulan.
Gina-engganyo sang mga otoridad sa Yokosuka, Kanagawa prefecture nga bayaran sang manunudlo kag duha ka supervisors ang katunga sang 3.5 million yen ($27,000) nga water bill.
Nagpangayo man sang pasaylo ang awtoridad sa Yokosuka bangud sa natuga sini nga financial damage sa syudad. ##
