ILOILO CITY – Ginsabat sang Wimbledon ang nangin reaksyon sang world no. 1 kag ang ila defending champion nga si Novak Djokovic matapos nga gin-ban ang tiglawas sang Russia kag Belarusia sa 2022 Wimbledon Championships bangud sang nagapadayon nga pagpangsakop sa Ukraine.
Gintawag ni Djokovic nga kabuangan ang amo nga tikang sang organizers.
Suno kay All England Lawn Tennis & Croquet Club (AELTC) Chairman Ian Hewitt, ginarespeto nila ang opinyon sang tanan.
Dugang pa niya, mabudlay subong ang sitwasyon kag kinahanglan sang organisasyon nga maghimo sang pamaagi.
Nag-agi sa madugay nga deliberasyon ang amo nga desisyon kag ginpangayo man ang suhestyon sang gobyerno sang England.
Sa nangin pahayag ni Djokovic sa Belgrade, indi niya suportado ang amo nga tikang sang Wimbledon.
Apang ginpahayag niya nga siya man ang isa sa una nga magakondenar sang kinagamo.
Nahibaluan niya ang emotional trauma nga matuga sang kinagamo bangud nga naagyan niya ini sang una.
