ILOILO CITY- Ginlauman na sang kampo ni anay San Dionisio, Iloilo Mayor Peter Paul Lopez nga ma-dismiss ang kaso nga murder nga gin-file batok sa ila may kaangtanan sa pagpatay sa negosyante nga si Claire Diergos.
Sa interview sang Bombo Radyo kay Atty. Dwight Trasadas, legal counsel sang pamilya Lopez, iya ginpahayag nga sa pagsugod pa lang sang pag-ulamid sa iya mga kliyente, maathag nga wala sang partisipasyon ang bisan sin-o nga myembro sang nasambit nga pamilya sa pagpatay sa biktima.
Suno kay Trasadas, apisar nga may mga testigo nga nagtudlo sa iya mga kliyente nga yara ang ila presensya sa lugar kun sa diin nasapwan ang biktima, wala sang may naka-establish sang ano man nga ‘overt act’ ukon nakakita sang akto gid sang pagpatay.
Pahayag niya, sa ila nga bahin, nakontra nila ang tanan nga testimoniya sang mga testigo paagi sa bastante nga documentary ang testimonial evidences.
Nahibaluan nga base sa resolusyon sang Iloilo Provincial Prosecutors Office, ang nalakip lang sa nakit-an nga may probable cause nga pasakaan sang kaso amo sanday Raffy Sorioso alias Nonoy; Gardo Ibrahim, nga may bansag man nga Gardo, Muslim, kag Yusof; kag si Ma. Rudelyn Sumbong nga timbang ni Diergos.
Gindugang naman ni Trasadas nga amo man ang legal counsel ni Sorioso, nga napat-ud sini nga madismiss man ang amo nga kaso bisan pa nga makalab-ot ini sa trial bangud nga wala man sang bastante nga ebidensiya batok sa iya.
Si Sorioso ang tinawo sadto sang anay alkalde.
Nahibaluan nga may kaso man ini nga murder bangud sa pagpatay kay Zaldy Villanueva nga pakaisa ni the late San Dionisio, Iloilo Mayor Larry Villanueva.
