Patay ang 26-anyos nga babayi matapos ginluthang sang iya mismo pakaisa nga lalaki sa Barangay Merced, Banate, Iloilo.
Ang biktima amo si Joyce Ferrer, kag ang suspek amo si Mel Ferrer, 42, lunsay residente sang nasambit nga barangay.
Antes ang insidente, ginapahayag duha ka na ka bulan nga wala nagahangpanay ang nasambit nga magpakaisa. Ginapahayag nag-ugat ang daan nga hiligut-anon sa tsismis.
Sa interview sang Bombo Radyo kay Police Master Sergeant Joelito Babayo III, imbestigador sang Banate Municipal Police Station, iya ginpahayag nga kagab-i, nagkumprontahanay na ang asawa sang suspek kag ang biktima.
Ginpatawag ang pulis kag na-settle man ang problema. Kaina sang aga, ginapahayag natabo liwat ang kumprontasyon, tubtub nga naka-intra na ang bana.
Suno kay Babayo, sang naggabot na sang armas ang suspek, nagdalagan pa ang biktima apang nakadasma sa kanal kag sang natumba, ginluthang ini sang suspek kag naigu gid sa wala nga dughan.
Gindala sa ospital ang biktima apang gin-deklarar nga dead-on-arrival. Nakit-an sa crime scene ang isa ka fired cartridge case sang .45 caliber pistol.
At large ang suspek kag ginapahayag dala sini ang gingamit nga armas. ##
